İlk 6 ayda 222 milyarddan çox vəsait cəlb olunub…

Qlobal maliyyə bazarlarında ən geniş yayılmış alətlərdən olan Səhmlərin İlkin kütləvi Yerləşdirilməsi (IPO) bazarı əsl inkişaf bumunu yaşayır.

Marja Ernst&Young (EY) audit və konsaltinq şirkətinin yeni hesabatına istinadla xəbər verir ki, təkcə 2021-ci ilin birinci yarımilliyində 1070 IPO sövdələşməsi imzalanıb. Nəticədə cəlb olunan vəsaitlərin həcmi 222 milyard dolları ötüb. Artım sövdələşmə sayında 150%, cəlb olunan vəsaitlərin həcmində isə 215% olub.

Amerika qitəsində dəyəri 93,9 milyard dollar olan 276 IPO, Asiya-Sakit okean regionunda 74,3 milyard həcmində 471 IPO baş tutub. Avropa, Orta Şərq, Hindistan və Afrika bölgəsində 323 IPO vasitəsilə 54 milyard dollara yaxın vəsait cəlb olunub.

Sektoral bölgüyə gəlincə, texniki IPO-lar 284 sövdələşmə və 90 milyard dollar vəsaitlə bütün əməliyyatların ən böyük hissəsini – 27%-ni təşkil edib. Daha sonrakı əsas yerləri 187 sövdələşmə və 33,4 milyard dollarla səhiyyə və 140 IPO və 24,3 milyard dollarlıq vəsaitlə sənaye sahələri tutur.

Hesabatda qeyd olunur ki, qlobal IPO bazarı 2021-ci ilin ikinci rübündə son 20 ildəki ən yaxşı nəticəni göstərib.