“Azərbaycanın mənzil bazarındakı qiymət dinamikası 2021-ci ilin sonlarından etibarən yüksəlməyə başladı. Təkcə 2022-ci ildə 30 faizə yaxın artım qeydə alındı. Qiymət dəyişiklikləri cari ilin əvvəlindən bu günə qədər davam etməkdədir”. 

Bu sözləri açıqlamasında Əmlak Ekspert Mərkəzinin direktoru, ekspert Ramil Osmanlı bildirib.

“Rusiya-Ukrayna müharibəsinin Azərbaycanın əmlak bazarına təsiri böyükdür” 

Onun sözlərinə görə, hazırda qiymət artımı faiz etibarilə ikirəqəmli göstəricini keçib və 13 faizdən bir qədər artıqdır:

“Qeyri-yaşayış sahələrində 7-8 faizlik, torpaq bazarında isə 10 faizlik artım müşahidə olunur. Belə davam edərsə, ilin sonuna qədər bu faizlərin hansı rəqəmlərlə ifadə ediləcəyini və bazarın gələcəyini indidən proqnozlaşdırmaq çətin olacaq”. 

Onun sözlərinə görə, Rusiya-Ukrayna müharibəsinin Azərbaycanın əmlak bazarına təsiri böyükdür:

“Bu səbəbdən də Rusiyadan Azərbaycana yönələn investisiyaların həcmi ciddi şəkildə artmaqdadır. Bu müharibə səbəbindən ölkəmizə böyük insan və kapital axını var. Gələnlər ya ev, və ya qeyri-yaşayış obyektləri alır, ya da mənzil kirayəyə götürürlər. Bu da təbii ki, daşınmaz əmlak bazarında qiymət artımına təsir edir”.  

Ramil Osmanlı qeyd edib ki, bəzi tikinti materiallarının da qiymətində artımlar var:

“Əsas səbəb isə Ukrayna bazarlarında yaranan böhran və Rusiyaya qarşı tətbiq edilən sanksiyalardır. Buna görə də həmin ölkələrdən göndərilən materiallarda texniki səbəbdən gecikmələr olur. Yaxın iki həftə ərzində ciddi qiymət artımı gözlənilmir. Rusiya-Ukrayna müharibəsi uzanarsa, tikinti materialları kəskin şəkildə bahalaşa bilər”. 

Tikinti materiallarının bahalaşmasında xarici faktorlar 

İqtisadçı-ekspert Xalid Kərimli də 2022-ci ildən etibarən Azərbaycanda daşınmaz əmlak və tikinti bazarında qiymət artımlarının olduğunu diqqətə çatdırıb.

Onun sözlərinə görə, əmlak bazarına mənfi təsir göstərən amillərdən biri də, Rusiya-Ukrayna müharibəsidir:

“Müharibə ilə əlaqədar ötən il Rusiyada səfərbərlik elan olundu. Orada yaşayan azərbaycanlıların çoxu müharibəyə getmək istəmədikləri üçün geri qayıtdı və daşınmaz əmlak bazara investisiyalar yatırmağa başladılar. İmkanı olanlar evlər və mənzillər aldılar, imkanı olmayanlar isə mənzil kirayə götürdülər ki, bu da həm aktivliyin, həm də əlavə xərclərin artmasına təsir etdi.  

Bundan əlavə, bazarda taxta materialları birdən-birə 30-40 faiz, nazik taxta (fanerka) isə 2 dəfə, yəni 20 manatdan 40 manata qalxdı.  

Dəmir materialları, əsasən də armaturlar 30-40 faiz baha qiymətə satıldı. Ötən il qum və sementin daşınması qiymətlərində yüksəlmələr baş verdi, yəni 1 kubmetri 12-13 manat olan qum birdən birə 25-28 manata qədər bahalaşdı”.  

© “Bizim.Media”