Samsung, 5G patentlərindən istifadə etməyə davam etmək üçün Nokia ilə yeni müqavilə imzalayıb.

Cənubi Koreyanın “Samsung” şirkəti Finlandiyanın telekommunikasiya avadanlığı istehsalçısı “Nokia” ilə, 5G və digər texnologiyalar sahəsində patentlərdən istifadəyə dair razılığa gəlib, müqavilənin dəyəri açıqlanmayıb.

Marja xəbər verir ki, müqavilənin bir neçə il müddətinə qüvvədə olacağı qeyd edilib.

Samsung-un Finlandiya şirkəti ilə ilk 5G müqaviləsi ötən ilin sonunda başa çatıb.

“Nokia-nın 5G və digər texnologiyalarda fundamental ixtiralarını əhatə edən müqaviləyə əsasən, Samsung 2023-cü il yanvarın 1-dən etibarən bir neçə il ərzində Nokia-ya ödənişlər edəcək. Müqavilənin şərtləri tərəflər arasında məxfi olaraq qalır”, – deyə məlumatda bildirilir.

Nokia-nın patent portfeli şirkətin 2000-ci ildən bəri yatırdığı 130 milyard avrodan çox tədqiqat və inkişaf investisiyalarına əsaslanır. Finlandiya mətbuatı qeyd edir ki, Çinin mobil telefon istehsalçıları Oppo, One Plus, Realme və Vivo Nokia ilə lisenziya müqavilələrini yeniləməyiblər və şirkət onları məhkəməyə verib.

Nokia-nın yanvarın 26-da rüblük maliyyə hesabatını açıqlayacağı gözlənilir.

Nokia Corporation mobil, stasionar, genişzolaqlı və İP şəbəkələri üçün telekommunikasiya avadanlığı şirkətidir. Qərargahı Finlandiyanın Espoo şəhərində yerləşir. 2021-ci ildə əməliyyat mənfəəti 2,158 milyard avro olub. Şirkət dünyanın təxminən 130 ölkəsində fəaliyyət göstərir.