Rusiya Federasiyası Təhlükəsizlik Şurasının sədr müavini Dmitri Medvedev bildirib ki, Rusiya ilə Çin arasında ticarət dövriyyəsi çox yaxın gələcəkdə, 2023-2024-cü illərdə 300 milyard dollara çatacaq.

“Mən 2000-ci ildə Vladimir Vladimiroviç Putinin nümayəndə heyətinin tərkibində Çinə ilk dəfə gedəndə ticarət dövriyyəmiz 8 milyard dollar idi. Hazırda 185 milyard dollardır və çox güman ki, çox yaxın gələcəkdə, bu il, gələn il 300 milyard dollar olacaq”, – deyib.

Həmçinin, Rusiya Federasiyası Təhlükəsizlik Şurasının sədr müavini qeyd edib ki, Çin artıq dünyanın bir nömrəli iqtisadiyyatına çevrilib.

“Bu yaxınlarda Avropa İttifaqı ilə ticarət dövriyyəmiz 400 milyard dollar idi, axmaq qərarlar verdikləri üçün indi azalıb. Vallah, Allah onların hökmünü versin, onlar bizdən qat-qat çox itirdilər”, -deyib.

Çin sədri Si Cinpin 20-22 mart tarixlərində dövlət səfəri ilə Rusiyada olub və bu, onun üçüncü müddətə dövlət başçısı vəzifəsinə yenidən seçildikdən sonra ilk xaricə səfəri olub. Bazar ertəsi Çin Xalq Respublikasının sədrinin Rusiya prezidenti Vladimir Putinlə qeyri-rəsmi görüşü olub, çərşənbə axşamı isə nümayəndə heyətlərinin iştirakı ilə Rusiya-Çin danışıqları keçirilib.

Səfər zamanı 2030-cu ilə qədər Rusiya-Çin iqtisadi əməkdaşlığının əsas istiqamətlərinin inkişaf etdirilməsi planına dair birgə bəyanat imzalanıb. Rusiya tərəfdən danışıqlarda Dmitri Medvedev də iştirak edib.