ABŞ-ın texnologiya şirkətlərindən olan Microsoft-un xalis mənfəəti ötən ilin oktyabr-dekabr dövründə əvvəlki ilin eyni dövrü ilə müqayisədə 12 faiz azalıb.

Oktyabr-dekabr dövrünü maliyyə təqvimində ikinci rüb kimi qəbul edən Microsoft, balans hesabatını açıqlayıb.

Marja xəbər verir ki, şirkətin gəlirləri ötən ilin oktyabr-dekabr dövründə əvvəlki ilin eyni dövrü ilə müqayisədə 2 faiz artaraq 52,7 milyard dollara çatıb. Microsoft 2021-ci ilin oktyabr-dekabr dövründə 51,7 milyard dollar gəlir əldə edib.

Şirkət bu dövrdə 2016-cı ilin iyununda başa çatan rübdən bəri ən aşağı gəlir artımını qeyd edib.

“Microsoft”un xalis mənfəəti eyni dövrdə 12 faiz azalaraq 16,4 milyard dollar olub. Ötən ilin eyni dövründə şirkətin xalis mənfəəti 18,8 milyard dollar olub.

Şirkətin səhm üzrə mənfəəti də bu müddət ərzində 2,48 dollardan 2,20 dollara qədər azalıb.

10.000 işçini ixtisar edəcəyini açıqlayıb

Microsoft, keçən həftə 10,000 işçisini işdən çıxaracağını elan edərək, şirkətin son 8 ildə ən böyük ixtisar qərarını verib.

Microsoft Baş İcraçı Direktoru (CEO) Satya Nadella xərcləri optimallaşdırdıqlarını bildirib: “Hər sektorda və coğrafiyada təşkilatların ehtiyatlı davrandıqlarını görürük. Dünyanın bəzi hissələri tənəzzül içindədir, digər regionlar isə tənəzzülü gözləyir”.