İlkin və təkrar bazar üzrə mənzil qiymətləri artmaqdadır. 2020-ci ildə pandemiya ilə əlaqədar olaraq daşınmaz əmlak bazarında qiymətlərdə nisbətən sabitlik müşahidə olunmuş, lakin sonrakı illərdə artım meylləri müşahidə edilmişdir. Bütövlükdə, 2020-ci ilin sonu ilə müqayisədə mənzil qiymətlərində 32.4% artım olmuşdur.

Marja xəbər verir ki, bu, Azərbaycan Respublikasının Mərkəzi Bankının 2024-cü ilin yekunları üzrə Maliyyə Sabitliyi Hesabatında bildirilir.

Qeyd edilib ki, ipoteka kreditləşməsi son illərdə ümumilikdə artım nümayiş etdirmişdir. 2020-ci ildən etibarən ipoteka kreditlərinin həcmi yüksəlmiş, lakin 2023-cü ildə artım tempində sabitləşmə müşahidə olunmuşdur. Bu sabitləşmə əsasən İKZF hesabına verilmiş kreditlər üzrə olmuşdur. Bu isə öz növbəsində təkrar bazar üzrə qiymətlərin artım tempinin stabilləşməsinə öz təsirini göstərmişdir.

Vurğulanıb ki, bankların daxili ipoteka faizləri artmaqdadır. Son dövrlərdə İKZF hesabına verilmiş ipoteka kreditləri üzrə faiz dərəcələrində əhəmiyyətli dəyişiklik müşahidə edilməsə də, bankların daxili resursları hesabına verilən ipoteka kreditləri üzrə faiz dərəcələri artmaqdadır. Daxili resurslar hesabına verilmiş ipoteka kreditlərinin ümumi ipoteka portfelində çəkisinin artması ipoteka kreditləri üzrə orta faiz dərəcələrinin artmasına səbəb olmuşdur.

2024-cü ildə mənzil qiymətlərinin artım tempi sərəncamda qalan gəlirlərin artım tempini üstələmişdir. Belə ki, Dövlət Statistika Komitəsinin məlumatına əsasən, ötən ilin sonu ilə müqayisədə mənzil qiymətləri 9.9%, sərəncamda qalan gəlirlərin artım tempi isə 5.9% təşkil etmişdir. Ümumilikdə isə, 2020-ci ildən etibarən mənzil qiymətləri 32%, sərəncamda qalan gəlirlər isə 39% artmışdır.