Azərbaycanın ən böyük özəl bankı olan “PAŞA Bank” ASC 2022-ci ilin birinci yarısını 64 milyon 844 min manat xalis mənfəət ilə başa vurub.

Bank 2021-cii lin birinci yarısını 50 milyon 640 min manat xalis mənfəət ilə bağlamışdı. Beləliklə, “PAŞA Bank” ASC-nin 2022-ci ilin 1-ci yarısında xalis mənfəəti ötən ilin eyni dövrü ilə müqayisədə 14 milyon 204 min manat və ya 28% artıb.

GƏLİRLƏRİ ARTIB

Marja.az xəbər verir ki, “PAŞA Bank”ın 2022-ci ilin birinci yarısında cəmi əməliyyat gəlirləri (faiz və qeyri-faiz gəlirləri) 223 milyon 849 min manat, cəmi əməliyyat xərcləri 128 milyon 688 min manat, gəlirlər xərcləri üstələdiyindən əməliyyat mənfəəti 95 milyon 161 min manat təşkil edib. Bank əməliyyat mənfəətindən 9 milyon 114 min manat mümkün zərərlər üçün yaradılan məqsədli ehtiyatlara ayırıb və 21 milyon 203 min manat mənfəət vergisi ödəyib.

Müqayisə üçün qeyd edək ki, 2021-ci ilin birinci yarısında “PAŞA Bank”ın cəmi əməliyyat gəlirləri 188 milyon 833 min manat, cəmi əməliyyat xərcləri 102 milyon 213 min manat, əməliyyat mənfəəti 86 milyon 621 min manat, mümkün zərərlər üçün yaradılan məqsədli ehtiyatlara ayırması 24 milyon 473 min manat, ödənilmiş mənfəət vergisi 11 milyon 507 min manat təşkil etmişdi.

BANK DAHA DA BÖYÜYÜB

30 İyun 2022-ci il tarixində “PAŞA BAnk” 7 milyard 422 milyon 62 min mant cəmi aktivlərə, o cümlədən 2 milyard 510 milyon 754  min manat kredit portfelinə (müştərilərə verilmiş kreditlər) malik olub. Bank 2021-ci ilin sonunda 6 milyard 408 milyon 381 min manat cəmi aktivlərə, 2 milyard 545 milyon 578 min manat kredit portfeli  təşkil etmişdi. Beləliklə, ilk 6 ayda “PAŞA Bank”ın cəmi ativləri  1 milyard 13 milyon 681 min manatartıb, kredit portfeli isə 34 milyon 824 min manat azalıb.