Türkiyədə xaricilərə satılan evlərin 20 faizini ruslar alır. Ölkədə rusların üstünlük təşkil etdiyi kiçik qəsəbələr yarana bilər.

Oktyabr ayında Türkiyədə əcnəbilərin satın aldığı evlərin sayı 5 min 377 olub.

Marja.az Türkiyə Statistika Təşkilatına (TÜİK) istinadən xəbər verir ki, oktybar ayında Antalyada satılan 6 min 323 evdən 2 min 123-ü, İstanbulda satılan 16 min 987 evdən 1658-i xaricilərə satılıb. Beləliklə, oktyabr ayında İstanbulda satılan hər 10 evdən 1-ni, Antalyada isə hər 3 evdən 1-ni əcnəbilər alıb.

Oktyabr ayında Türkiyədə xaricilərə ev satışının cəmi ev satışlarında payı 5,2% təşkil edib.

Xaricilərə ev satışında ilk yeri 2 min 123 satış ilə Antalya tutub. İkinci və üçüncü yerləri müvafiq olaraq 1658 satışla İstanbul və 490 satışla Mersin tutub.

Oktyabr ayında Rusiya vətəndaşları Türkiyədən 2 min 23 ev alıblar. Rusiya vətəndaşlarının ardınca 498 ev alışı ilə İran, 310 ev alışı ilə İraq və 216 ev alışı ilə Ukrayna vətəndaşları gəlir.

2022-ci ilin yanvar-oktyabr aylarında Türkiyədə xaricilərə mənzil satışı 2021-ci ilin eyni dövrü ilə müqayisədə 26,9% artaraq 55 min 21 olub. Evlərin 21 min 252-si İstanbulda, 16 min 779-u isə Antalyada alınıb.

Xaricilərə satılan evlərin 20 faizini ruslar alır

2022-ci ilin 10 ayında xarici investorlara satılan 55 min 21 evin 20,60%-ni rus investorlar alıblar. Xüsusilə müharibədən sonra rusların Türkiyədə mənzil almağa marağı daha da artıb. Ruslar xüsusilə tətil bölgələrindən mənzil almağa üstünlük verirlər. Antalya və Bodrum hazırda onların sevimli bölgələridir. Bu maraq belə davam edərsə, rusların üstünlük təşkil etdiyi kiçik qəsəbələr yarana bilər.