2020-ci ildən 2060-cı ilə qədər Çinin energetika sektoruna investisiyaları 100 trilyon yuanı (13,7 trilyon dollar) keçə bilər. İnvestisiya müddəti Pekinin 2060-cı ilə qədər karbon dioksid daxil olmaqla, istixana qazlarının xalis sıfır emissiyasına nail olmaq üzrə ÇXR-in Sədri Si Cinpinin vədinə uyğundur.

AZƏRTAC xəbər verir ki, bu barədə Sinxua agentliyinin yaydığı məlumatda deyilir. Çinli tədqiqatçılar deyirlər ki, həmin məqsədə nail olunarsa, bu əsrdə ehtimal olunan qlobal istiləşməni 0,2-0,3 dərəcə Selsi cilovlamaq mümkün olacaq. Hazırda CO2 emissiyalarının təxminən 30 faizi dünyanın ikinci ən böyük iqtisadiyyatı olan Çinin payına düşür.

Agentlik bu yaxınlarda yayılan hesabata istinadla bildirir ki, enerji fəaliyyətləri Çində karbon dioksid emissiyalarının əsas mənbəyidir. İkirəqəmli karbon emissiyası hədəfinə nail olmaq üçün bu ölkənin enerji istehsalı qarışığının təmiz və aşağı karbonlu mənbələrə çevrilməsi sürətləndirilməlidir.

Rəsmi “China News Services” avqust ayında Çin Elektrik Enerjisi Tikinti Müəssisələri Assosiasiyasına istinadla xəbər verib ki, 2022-ci ildə Çindəki böyük elektrik enerjisi şirkətləri təmiz energetika sektoruna cəmi 1,25 trilyon yuan sərmayə qoyub. Eyni zamanda, 2022-ci ildə günəş enerjisi istehsalına investisiyalar 232,7 faiz artaraq 286,6 milyard yuana çatıb.

Çin Dövlət Planlaşdırma Agentliyinin keçən il verdiyi məlumata görə, enerji istehsalının 2020-ci ildəki 28,8 faizdən 2025-ci ilə qədər təxminən 33 faizi bərpa olunan mənbələrindən əldə ediləcək. EY konsaltinq şirkəti tərəfindən bu il dünyanın ən yaxşı 40 bərpa olunan enerji bazarının illik reytinqində Çin ABŞ və Almaniyadan sonra 3-cü yerdə qərarlaşıb.