Ukrayna Milli Bank valyuta ehtiyatlarını qorumaq üçün müharibə başlayandan bəri 29,25-də sabit saxladığı dollar/qrivna məzənnəsini 36,5686-ya qaldıraraq valyutanı devalvasiya edib.

Ukrayna Milli Bank Rusiyanın işğalının iqtisadiyyata ağır zərbə vurduğu bir şəraitdə valyuta ehtiyatlarını qorumaq üçün rəsmi valyuta olan qrivnanı devalvasiya edib.

Marja xəbər verir ki, Bankın cümə axşamı yaydığı açıqlamaya görə, dollar/qrivna məzənnəsi 5 ay ərzində sabit olduğu 29,25 qrivnadan 36,5686 qrivnaya yüksəldilib.

Beləliklə, qrivna dollar qarşısında təxminən 25% ucuzlaşdırılıb.

Ukrayna Milli Bankı qeyd edib ki, bu addım Ukrayna istehsalçılarının rəqabət qabiliyyətini artıracaq və müharibə zamanı iqtisadiyyatın dayanıqlığını dəstəkləyəcək.

“Müharibənin əvvəlində bir ABŞ dollarının 29,25 qrivna səviyyəsində müəyyən edilməsi maliyyə sisteminin stabil fəaliyyətini təmin etməyə kömək etdi. Müharibə təxminən beş aya yaxındır davam edir ki, bu müddət ərzində bizim və dünya iqtisadiyyatında mühüm dəyişikliklər baş verib. Belə bir şəraitdə qrivnanın fevralın 24-də olan rəsmi məzənnəsi artıq reallığa uyğun gəlmir və get-gedə qrivnanın valyuta məzənnəsi rolunu itirir. Bunu nəzərə alaraq, Milli Bank rəsmi məzənnəni korreksiya edir və məzənnəni 36,5686 UAH/ABŞ dolları səviyyəsində müəyyən olunur”, – Ukrayna Milli Bankının rəhbəri Kirilo Şevçenko bildirib.