Səudiyyə Ərəbistanının Pakistanın paytaxt İslamabaddakı Beynəlxalq İslam Universitetinin kampusunda tikəcəyi Kral Salman bin Əbdüləziz Məscidi iki ölkə arasında son illər inkişaf edən dostluq münasibətlərinin rəmzi olacaq. AZƏRTAC xəbər verir ki, bu sözləri Pakistanın Baş naziri İmran Xanın müşaviri Hafiz Tahir Əşrəfi söyləyib.

Bir neçə bölmədən, o cümlədən böyük kitabxana, muzey, vəliəhd-şahzadə Məhəmməd bin Salmanın adını daşıyacaq auditoriya İslam mədəniyyəti və irsinin tədqiqi mərkəzinin yerləşəcəyi məsciddə eyni vaxtda 1200 dindar ibadət edə biləcək. Səudiyyə Ərəbistanı hökuməti tikintiyə ilk olaraq 3,3 milyon dollar vəsait ayırıb və yaxın günlərdə inşaat işlərinə başlanacaq.

Pakistan Beynəlxalq İslam Universitetinin rektoru Məsum Yasinzai bildirib ki, tələbələrə ərəb dili, şəriət qanunları və s. dərsləri keçmək üçün Səudiyyə Ərəbistanından 15 professor göndəriləcək. Bundan başqa, Kral tərəfindən universitetin 250 tələbəsinə təqaüd ayrılacaq.