ABŞ Mərkəzi Bankı (Fed), ölkədə inflyasiya aşağı qalmaqda davam edərsə və qlobal risklər pisləşsə səbirli mövqeyini sona çatdırıb faiz endiriminə gedə bilər.

 

ABŞ Prezidenti Donald Trampın Çin ilə ticarət müharibəsi səbəbindən artan iqtisadi risklər, Fed rəsmilərinin səbirli dayanmalarını bir kənara qoymalarına və faiz endiriminə yönəlmələrinə səbəb ola bilər.

 

“Marja” “New York Times”in xəbərinə istinadən xəbər verir ki, ABŞ Mərkəzi Bankı, Trampın Çin ilə bu ay ticarət müharibəsini şiddətləndirdiyi,  bunun nəticəsində bazarların sarsıldığı və qlobal iqtisadi inkişafa təhdidin artdığı bir mühitdə,onsuz da aşağı olan inflyasiya ilə mübarizə aparır.

 

ABŞ-da inflyasiya 10 ildir davam edən yumuşaq pul siyasəti dövrünün böyük qisimində hədəf səviyyə olan 2%-dən aşağı qalıb. Əgər risklər davam edərsə ya da pisləşsə, bu vəziyyət Fed rəsmilərini iqtisadiyyatı dəstəkləmək üçün potensial faiz endirimini də ehtiva edən addımlar atmağa yönəldə bilər.

 

Fed sədrinin köməkçisi Richard Clarida Cümə axşamı günü etdiyi açıqlamada, “Əgər gələn məlumatlar inflyasiyanın 2% olan hədəfimizdən inadçı şəkildə aşağı qaldığını ya da qlobal iqtisadi proseslərin risklər yaratdığını göstərsə, rəsmilər, faizlərin dəyişdirilib dəyişdirilməməsini qiymətləndirəcəklər” deyib.

 

Clarida, daha sonra bir suala verdiyi cavabda, “Əgər risklər görsək, bu vəziyyət daha yumuşaq bir siyasət aparmağı tələb edən bir faktor olacaq” deyib.

ABŞ Prezidenti Donald Tramp və Çinin Dövlət başçısı Xi Jinpingin gələn ayın sonlarında Yaponiyanın Osaka şəhərində təşkil ediləcək G-20 zirvəsində görüşəcəyi gözlənilir. Bu yığıncaqdan bir razılaşma çıxarsa, risklər sürətlə azala bilər. Ancaq bu yığıncaqdan bir razılaşma olmadığı ortaya çıxarsa, Fed bir reaksiya verməyin lazım olduğunu düşünə bilər.