Əgər 2019-cu ilin 10 ayı ərzində inşaat və əmlak sektoruna kredit qoyuluşları cəmi 11 milyon manat atrmışdırsa, 11-ci ayda, yəni noyabrda artım 183.6 milyon manat təşkil edib.

 

“Marja” Mərkəzi Bankın statistikasına istinadən xəbər verir ki, inşaat və əmlak sektoruna kredit qoyuluşları 2019-cu ilin oktyabr ayının sonunda 399,9 milyon manat ikən, noyabr ayının sonunda 583,5 milyon manata çatıb.

 

İnşaat və əmlak sektoruna kredit qoyuluşları 2018-ci ilin sonunda 388,8 milyon manat təşkil etmişdi.

 

TİCARƏT VƏ XİDMƏT SEKTORUNA KREDİT QOYULUŞLARI GERİLƏYİB

 

Oktyabr ayının sonu ilə müqayisədə Noyabr ayında ticarət və xidmət sektoruna cəmi kredit qoyuluşları 76.8 milyon manat azalaraq 2 milyard 339,5 milyon manata düşüb.

 

Energetika, kimya və təbii ehtiyatlar sektoruna kredit qoyuluşları 68.9 milyon manat artaraq 611,2 milyon manata yüksəlib.

 

Kənd təsərrüfatına kredit qoyuluşları 700 min manat azalaraq 520,1 milyon manata geriləyib.

 

Nəqliyyat və rabitə sektoruna kredit qoyuluşları 43.8 milyon manat artaraq 1 milyard 207,8 milyon manata yüksəlib.

 

Sənaye və istehsal sektoruna kredit qoyuluşları isə 26 milyon manat artaraq 930,9 milyon manata çatıb.

 

Oktyabr ayının sonu ilə müqayisədə Noyabr ayında ev təsərrüfatlarına verilən kreditlər (istehlak kreditləri) 383.6 milyon manat artaraq 6 milyard 814 milyon 600 min manata çatıb.

 

Noyabrda cəmi kredit qoyuluşları isə 670.6 milyon manat artaraq Noyabr ayının sonunda 15 milyard 116 milyon 400 min manat təşkil edib.