Təhsillə bağlı yeni layihə…

 

PAŞA Həyat Sığorta şirkəti övladları məktəbəqədər hazırlıq, orta və ali təhsil ocaqlarında ödənişli təhsil alan tələbələrin valideynləri üçün hazırlanmış yeni “Davamlı təhsil” məhsulunu təqdim edir. Məhsulun əsas məqsədi valideynin başına gələ biləcək arzuolunmaz hallar zamanı övladın təhsilinin davamlılığını təmin etmək üçün təhsil haqqının sığorta şirkəti tərəfindən ödənilməsindən ibarətdir.

 

Məhsulun sığorta təminatına ödənişli təhsil alan tələbənin valideynlərindən birinin (Sığortalanan şəxsin) istənilən səbəbdən ölümü və ya bədbəxt hadisə nəticəsində I qrup əlilliyi daxildir.

 

Sığortanın müddəti 1 ildən 10 ilə qədər, sığorta məbləği isə 100.000 AZN-ə qədər müəyyən olunub.

 

Sığorta məbləği və ya sığorta haqqının müəyyən olunması Sığortalanan şəxsin yaşı, sağlamlıq durumu, peşə fəaliyyəti və digər meyarlar əsasında xüsusi kalkulyator vasitəsilə hesablanır. Nümunə: 37 yaşında şəxs 3 il müddətinə 20.000 AZN məbləğində “Davamlı təhsil” sığortası əldə edərsə, bu halda ildə cəmi 192 AZN ödəməlidir.

 

Sığorta müddətində sığorta hadisəsi baş verdikdə öncə tələbənin təhsil aldığı müəssisəyə qalıq təhsil haqqı borcu ödənilir, əgər əlavə vəsait qalarsa, o halda həmin məbləğ Sığortalının təyin etdiyi faydalanan şəxsə (övlad, həyat yoldaşı və ya digər şəxslər) ödənilir.

 

Layihə barədə PAŞA Həyat Sığortanın Satış kanalları və marketinq departamentinin direktoru Vüsal Nağıyev bildirib:

 

“Dünyanın müxtəlif ölkələrində həyat sığortasına maraq göstərən şəxslərin böyük bir hissəsi öz ailəsi və əzizlərinin qayğısız gələcəyini təmin etmək məqsədi güdür. Apardığımız araşdırmalar göstərdi ki, Azərbaycanda gənc valideynlər övladlarının keyfiyyətli təhsili ilə əlaqədar mövzularda çox həssasdırlar. Bu baxımdan valideynlərin bir qismi övladlarının ödənişli təhsil ocaqlarında daha keyfiyyətli təhsil ala bilmələri üçün hər il bəlli miqdarda xərc çəkirlər. Eyni zamanda mümkün ola biləcək arzuolunmaz hadisələr nəticəsində övladlarının təhsilinin davamlılığını təmin etmək üçün sığortalanmağa üstünlük verirlər. Necə deyərlər ehtiyat igidin yaraşığıdır! İnanıram ki, dəyərli valideynlərimiz öz həyatlarını sığortalamağı ölkənin ən etibarlı sığorta şirkətinə həvalə edəcəklər”.

 

Məhsul barədə daha ətraflı məlumatı www.pasha-life.az saytından və ya (012) 942 Əlaqə mərkəzindən əldə edə bilərsiniz.