Almaniyanın avtomobil brendi və Almaniyanın mühərrik yağı istehsalçısı güclərini birləşdirir.

 

“APA-Economics” xəbər verir ki, “AUDI Azərbaycan” və Almaniyanın mühərrik yağları və qatqıları üzrə mütəxəssisi olan “Liqui Moly” birgə əməkdaşlıq haqda razılığa gəliblər. Artıq “Liqui Moly” “Audi” şirkətini yağlar, qatqılar və digər çoxsaylı mayelərlə təmin edir.

 

Əməkdaşlıqla bağlı ictimaiyyətə məlumatı “Liqui Moly” şirkətinin Şərqi Avropa ölkələri üzrə satış meneceri Andreas Maydel, “Audi”nin Azərbaycan üzrə idxalçısı, “Europian Cars” şirkətinin direktoru Fərid Aslan və “Liqui Moly”nin Azərbaycan təmsilçisi olan “Azinterservice Co” şirkətinin baş meneceri Azər Məmmədov çatdırıb.

 

İlk öncə “Azinterservice Co” şirkəti barədə məlumat verən A.Məmmədov bildirib ki, Azərbaycan bazarında “Liqui Moly” şirkətini təmsil edir.

 

“Şirkətimizin konsepsiyasının əsas istiqamətlərindən biri avtomobil sahibləri ilə sıx əlaqədə olan partnyorumuzun biznes fəaliyyətini araşdıraraq onun təklif etdiyi xidmətlərə yeni dəyərlər qatmaq, onun keyfiyyətini yaxşılaşdırmaq, ən əsası onu rentabelli etməkdir. “Europian Cars” şirkəti ilə yeni yaradılmış əməkdaşlığımız da qeyd etdiyim prinsiplər əsasında qurulub. Ümid edirəm ki, bu tərəfdaşlıq həm dəyərli partnyorumuz, həm də bütün “Audi” sevərlər üçün böyük fayda verəcək”, – deyə A.Məmmədov vurğulayıb.

 

Daha sonra çıxış edən “AUDI Azərbaycan” şirkətinin direktoru F.Aslan qeyd edib ki, “Liqui Moly” məhsulları “Audi”nin öz təchizatçılarından tələb etdiyi yüksək standartlara cavab verir.

 

“6 ildir Azərbaycanda “Audi”nin yeganə idxalçısıyıq. İlk növbədə avtomobillərin yüksək keyfiyyəti, müştərilərə yüksək xidmət və təbii ki, bizim çalışdığımız partnyorların bizi yüksək keyfiyyətli məhsul ilə təmin etməsidir. LIQUI MOLY məhsulları, AUDI-nin öz təchizatçılarından tələb etdiyi yüksək standartlara cavab verir. Belə bir partnyorla əməkdaşlıq bizim üçün çox xoşdur. “Europians Cars” şirkəti aprelin 7-də Qafqazda premium avtomobil seqmentində ən böyük avtosalonun açılışını planlaşdırır. Həmçinin həmin təqvimdə “Audi”nin yeni A8 modelinin təqdimatını keçirməyi planlaşdırırıq”, – deyə F.Aslan əlavə edib.

 

“Liqui Moly” Azərbaycanda 20 ildir fəaliyyət göstərdiyini qeyd edən şirkətin Şərqi Avropa ölkələri üzrə satış meneceri A.Maydel “Liqui Moly”nin Azərbaycandakı dövriyyəsi bir neçə Avropa ölkəsindən daha böyük olmağını vurğuladı.

 

“Bir çox rəqiblərimiz arasında Azərbaycan kimi ölkələrə xüsusi diqqətin yetirilməməsi müşahidə olunur. Lakin biz bu ölkədə böyük imkanları çox-çox əvvəl görmüşdük və özəl yanaşma strategiyamız özünü doğrultdu. Almaniyada 60 il öncə şirkətimizi qurmuşuq və biz ən yaxşı şirkət olaraq tanınırıq. “Audi” ilə əməkdaşlıqdan məmnunuq. “Liqui Moly” şirkətinin daxili qanununlarına əsasən, bütün məhsullar yalnız Almaniyada istehsal olunur. Bu da öz növbəsində uğurun bir hissəsidir. Azərbaycandakı sürücülərin əldə etdikləri “Liqui Moly” yağları və qatqıları Almaniyadakı sürücülərin istifadə etdikləri məhsullarla tamamilə identik məhsullardır. Müvəffəqiyətin daha bir amili odur ki, “Liqui Moly” özünü yalnız yağ və qatqıların satıcısı kimi deyil, eyni zamanda fərdi sürücülərə, yağdəyişmə və servis məntəqələrinə maksimal fayda və verimlilik zəmanətçisi olaraq təqdim edir. Müvafiq olaraq “Liqui Moly” öz məhsullarının istifadə qaydası və son texnoloji yeniliklər haqqında məlumatların çatdırılması məqsədi ilə mütəxəssislər üçün çoxsaylı tədris proqramları və təlimlər təşkil edir”, – deyə A.Maydel qeyd edib.

 

“Liqui Moly” bir çox ölkələrdə olduğu kimi Azərbaycanda da öz məhsullarının satışını bazara bir başa yox müstəqil idxalçı partnyorlar vasitəsi ilə həyata keçirir. Bakıda bu partnyor “Azinterservice Co.” firmasıdır.

 

Ənənəvi olaraq “Liqui Moly”-nin avtomobil istehsalçıları, xüsusən də Alman şirkətləri ilə çox sıx münasibətləri olur. Almaniyada AUDI və “Liqui Moly” şirkətlərinin baş qərargahları bir birindən təxminən iki saatlıq məsafədə yerləşir. Bu da sıx əməkdaşlığın əsas səbəblərindən biridir.

 

Belə bir əməkdaşlıq zəruriyyəti müasir mühərriklərdə yağlara qoyulan çoxsaylı tələblərdən irəli gəlir: yağ yalnız yağlama deyil, həm də mühərrikin təmizlənməsi, korroziyadan müdafiə funksiyasını yerinə yetirməklə, geniş temperatur diapazonlarında işləməli, daxili sürtünməni azaltmalı və nəticədə əvvəlki illərə nisbətən mühərrikin yağ dəyişmə intervallarının uzadılmasına imkan yaratmalıdır. Bu səbəbdən müasir mühərrik yağları artıq sadəcə universal yağlayıcılar deyil, hər bir mühərrik üçün məxsusi olaraq özəl lahiyəndirilmiş maye halında olan “ehtiyat hissəsidir”. Yanlış yağ istifadəsi yanlış ehtiyat hissənin quraşdırılmasına bənzəyir.

 

A.Maydel vurğulayıb ki, bu, ən uğurlu əməkdaşlıq modelidir: “Biz ən yüksək keyfiyyətli yağlara və mayelərə, “Azinterservice Co.” isə mükəmməl bazar biliklərinə malikdir”.