Hindistan konqlomeratının bazar kapitallaşması 361 milyard dollara çatır

Hindistan konqlomeratı “Tata Group” 30 trilyon rupi (361 milyard dollar) bazar kapitallaşmasına çataraq ölkə tarixində bu səviyyəyə çatan ilk sənaye qrupu olub.

Marja.az xəbər verir ki, bu barədə Money Control məlumat yayıb.

“Tata Group”, səhmləri birjada satılan müxtəlif profilli 24 şirkətə malikdir. İlin əvvəlindən onlardan dördünün dəyərində əhəmiyyətli artım baş verib. Avtomobil istehsalçısı “Tata Motor”, enerji şirkəti “Tata Power” və “Indian Hotels” otellər şəbəkəsinin səhmləri 16-20%, konsaltinq şirkəti “Tata Consultancy Services”ın səhmləri isə 9% bahalaşıb. Nəticədə, “Tata Group”un ümumi bazar dəyəri çərşənbə axşamı Hindistanda bütün zamanların ən yüksək həddinə çatıb.

Nəşr “Tata Motor”un səhmlərinin dəyərinin artmasına səbəb kimi xammalın aşağı qiymətini, yarımkeçiricilərin qıtlığının azalmasını və sabit tələbi göstərir. “Tata Consultancy Services” 2023-cü ilin son rübündə ümumi məbləği 8,1 milyard dollar olan çoxsaylı müqavilələri təmin edə bilib ki, bu da bir ilin eyni dövrü ilə müqayisədə təxminən 4% çoxdur.

Nəşr “Tata Power” səhmlərinə artan tələbatı həm 2023-cü ildəki uğurlu performansla, həm də Hindistan hökumətinin şirkətin əsas fəaliyyət sahələrindən biri olan bərpa olunan enerji mənbələrindən istifadəni genişləndirmək planları ilə əlaqələndirir. Hindistan otellərinin dəyərinin artması koronavirus pandemiyasının bitməsindən sonra turist axınının artması ilə əlaqədardır.